Protestë në Serbi, kundër vendimit të Hagës për Karaxhiqin

“Serbët nuk do të pranojnë këtë lloj drejtësie. Kjo drejtësi është kundër serbëve dhe nuk do të pranohet kurrë prej tyre”, tha Sheshel para protestuesve në Beograd

Dënimi prej 40 vjetësh burg, për ish liderin serb të Bosnjës dhe Hercegovinës, Radovan Karaxhiq, është pritur me protesta në Serbi, duke e cilësuar vendimin Gjykatës së Hagës si jo të drejt. I akuzuar për krime lufte, gjenocid, vrasje e shfarosje, Karaxhiq është përgjegjës edhe për masakrën e Srebrenicës, ajo që konsiderohet si ‘turpi i Evropës”

Kundër shqiptimit të dënimit, kanë dalë mbështetësit e partive nacionaliste të akuzuarit tjetër për krime lufte, Vojisllav Sheshel. Ky i fundit bëri thirrje për protesta, por pa dhunë. Në protestën e thërritur nga radikalët u pa një pjesëmarrje masive. Udhëheqësi e cilësoi burgosjen e Karaxhiqit si dënim kundër popullit serb.

“Serbët nuk do të pranojnë këtë lloj drejtësie. Kjo drejtësi është kundër serbëve dhe nuk do të pranohet kurrë prej tyre”, tha Sheshel, citon TCH.

Haga dënoi me 40 vjet burg Radovan Karaxhiç, ndaj të cilit rëndonin akuza të shumëfishta. Në leximin e vendimit, gjykatësit e kanë shpallur Karaxhiqin fajtor për akuzën e gjenocidit për masakrën e Srebrenicës, krime kundër njerëzimit në zona të ndryshme të Bosnjës, shfarosje, shkelje të rregullave të luftës, etj.

Nesër, në një mbledhje të jashtëzakonshme do të mblidhet edhe Qeveria e Serbisë e drejtuar nga kryeministri Aleksandër Vuiçiq. Tema e vetme do të jetë vendimi i Tribunalit Penal të Hagës për Radovan Karaxhiqin.