Pronari i lokalit “La Constellation” thyen heshtjen

Pronari i lokalit "La Constellation" në Crans-Montana thotë se po bashkëpunon me autoritetet. "Gjithçka ishte në përputhje me rregulloret"

Jacques M., me origjinë nga Korsika është pronar i barit ku ndodhi tragjedia e rëndë, në Crans -Montana. Ai e drejton lokalin me gruan e tij Jessica M. që nga viti 2015. Jacques ka folur me gazetarët e 20 Minuten të premten pasi ata e takuan jashtë shtëpisë së tij në Crans-Montana. Ai mes tjerash ka thënë: “Ne do të bëjmë gjithçka që është në fuqinë tonë për të ndihmuar në sqarimin e rrethanave. Po bëjmë gjithçka që mundemi. Avokatët tanë janë gjithashtu të përfshirë”, transmeton albinfo.ch.

Në një bisedë telefonike me stafin editorial të 24 Heures, Jacques M. shpjegoi se lokali i tij ishte inspektuar “tre herë brenda dhjetë viteve” dhe se “gjithçka ishte në përputhje me rregulloret” në ato raste. Stéphane Ganzer, shefi i sigurisë së kantonit Valais, deklaroi në një konferencë për shtyp të premten pasdite se inspektimet vjetore rekomandohen në fakt për këtë lloj lokali.

Autoritetet kantonale aktualisht besojnë se shkuma për thithje të zhurmës, e vendosur në tavan ka mundësi të ketë shkaktuar që i gjithë lokali të merrte flakë pasi u ndez nga fishekzjarrët e vendosur në shishet e shampanjës. Videot që mbështesin këtë hipotezë po qarkullojnë në mediat sociale.

Pronarët, Jessica dhe Jacques M., janë intervistuar si dëshmitarë nga zyra e prokurorit publik, shpjegoi Beatrice Pilloud, prokurorja e përgjithshme e kantonit Valais, në të njëjtën konferencë për shtyp të premten pasdite, përcjell albinfo.ch. Ky status do të thotë se ata ende nuk janë akuzuar zyrtarisht, por përfshirja e tyre në çështje nuk mund të përjashtohet në këtë fazë të hetimit, raportohet nga 24 Heures.

Jacques nuk ishte në bar në kohën e shpërthimit të zjarrit. Gruaja e tij ishte e pranishme dhe pësoi djegie në krah, por tashmë është liruar nga spitali.

Sipas autoriteteve kantonale, 40 persona kanë vdekur në zjarrin, i cili ndodhi natën e 31 dhjetorit deri më 1 janar në barin “Le Constellation” në Crans-Montana, Valais. 119 të tjerë u plagosën, nga të cilët 113 janë identifikuar dhe 80 janë në gjendje kritike.

---