Profesori shqiptar i violinës, ish refugjat, bën muzikë për refugjatët

Më 22 mars në sallën e komunës Starnberg mbahet një koncert bamirësie në mbështetje të Caritasit për përkujdesjen e refugjatëve të mitur. Do të interpretojnë Fabiola Tedesco dhe Johannes Ascher të dy studentë të violinës në klasën e profesorit shqiptar të violinës, Rudens Turku në kosnervatorin e landit të Vorarlsbergut.

Me këtë rast, Rudens Turku do të flasë për fillimet e qëndrimit të tij në Gjermani. Ai e ka përjetuar vetë se si është të jesh i huaj në një vend. Violinisti i lindur në Tiranë, Shqipëri, ka ardhur në Gjermani në fillim të viteve `90 si 14 vjeçar, shkruan wuermtal.net. Gjuha e tij ka qenë dhe vazhdon të jetë muzika. Për të «muzika nuk është vetëm një radhitje e notave njëra pas tjetrës por po ashtu edhe gjuhë e shpirtit, tranmseton albinfo.ch. Ajo mundëson kuptimin pa pasur nevojë për fjalë, muzika dhuron shpresë dhe lidh njerëzit mes vete».

Përkundër të gjitha pengesave dhe vështirësive të cilat duhet t`i tejkalojë në përditshmërinë e tij një i ri me prejardhje të huaj, Rudens Turku u fokusua në përvojat e tij pozitive, të cilat donte t`i ndante me talentët tjerë të rinj. Ata ishin shkaktarët që ai të themelojë që në vitin 2000 festivalin e njohur «Starnberger Musiktage».

Situata aktuale me refugjatët e bën atë të mendojë lidhur me të kaluarën e vet. Për këtë arsye ai ka zgjedhur titullin «Muzika afron» për koncertin e tij, përcjell albinfo.ch. Dhe rrjedhimisht ai ka vendosur për fillimin e koncertit t`i prezantojë dy studentët e tij të dalluar Fabiola Tedesco dhe Johannes Ascher. Ndërsa pastaj ai për të pranishmit, në mesin e të cilëve do të ketë edhe refugjatë, do të bëjë prezantimin e rrugës së tij jetësore.