Procedurat e azilit “fast track” zgjerohen edhe për Guinenë

Përvoja tregon se njerëzit nga Guinea kanë pak nevojë për mbrojtje sipas ligjit për azil. Në vitin 2016, shkalla e njohjes (e azilit) ishte 0% dhe shkalla e mbrojtjes (e azilit dhe e pranimeve të përkohshme) prej rreth 2%

Keystone

Guinea është një nga vendet kryesore të origjinës së azilkërkuesve në Zvicër. Që nga vera e 2016-ës, numri i kërkesave për azil nga shtetasit e Guinesë është rritur. Por, përvoja tregon se këta njerëz kanë nevojë të pakët për mbrojtje. Për këtë arsye, Sekretariati i Shtetit për Migrim ka vendosur më 21 shkurt 2017 të zbatojë procedurën e shpejtë (fast track) për azilkërkuesit nga Guinea. Kjo procedurë ka për qëllim të trajtojë më shpejt kërkesat e pabaza për azil nga njerëzit e vendeve, ku shkalla e njohjes për azil është e ulët.

Zvicra ka shënuar një rritje të qëndrueshme të kërkesave për azil nga shtetasit e Guinesë që prej gjysmës së dytë të vitit 2016. Vitin e kaluar, 900 persona nga Guinea kanë aplikuar për azil në Zvicër (2015: 274 kërkesa). Me 120 aplikime gjatë muajit janar 2017, Guinea merr vendin e dytë të origjinës së azilkërkuesve në Zvicër. Kjo është e lidhur me numrin e madh të shtetasve guineas që kanë arritur në Italinë jugore që nga mesi i vitit 2016.

Përvoja tregon se njerëzit nga Guinea kanë pak nevojë për mbrojtje sipas ligjit për azil. Në vitin 2016, shkalla e njohjes (e azilit) ishte 0% dhe shkalla e mbrojtjes (e azilit dhe e pranimeve të përkohshme) prej rreth 2%.

Efekti i qëndrueshëm i procedurave të përshpejtuara

Në vitin 2012 Sekretariati i Shtetit për Migrim (SEM) prezantoi procedurën e përshpejtuar të kërkesave të pabaza për azil, e cila zhvillohet për aplikimet për azil të paraqitur nga personat nga vendet evropiane që nuk kanë detyrim për vizë (duke përfshirë edhe Serbinë, Bosnjë e Hercegovinën, Shqipërinë dhe Maqedonin), si dhe Kosovën dhe Gjeorgjinë. Sa i përket procedurës së përshpejtuar, ajo ka qenë deri më tani e aplikuar për shtetasit e Marokut, Nigerisë, Tunizisë, Algjerisë, Gambisë dhe Senegalit. Trajtimi prioritar dhe i përshpejtuar i kërkesave për azil ka mundësuar zbritjen e qëndrueshme të numrit të aplikacioneve të reja nga shtetasit e vendeve, për të cilat nevoja e mbrojtjes është e pakët.