Procedura e shkurtuar, jo vetëm për Ballkanin

Numri i kërkuesve të azilit nga vendet e Ballkanit, nga 760 sa kanë qenë në gusht, ka rënë në gjithsej 60 në dhjetor, ose për 90%

Zyra Federale  për Migracion (BFM) po e shqyrton mundësinë që procedurën e përshpejtuar të azilit, të zbatuar për shtetet e Ballkanit, ta zgjerojë edhe me shtetet jashtë Europës.

Zyra Federale për Migracion verën e kaluar  ka ashpërsuar procedurat e azilit, duke  shkurtuar dukshëm procedurën për vendet ballkanike si: Serbia, Mali i Zi, Bosnja, Maqedonia dhe Shqipëria. Azilkërkuesve nga këto vende u janë lënë dispozicion vetëm 48 orë për të pritur përgjigjen nga Berna.

Dhe ky shkurtim ka treguar efekt të madh. Kështu, numri i kërkuesve të azilit nga vendet e përmendura nga 760 sa kanë qenë në gusht, ka rënë në gjithsej 60  në dhjetor. E shprehur në përqindje kjo është për 90 për qind më pak.

Prejse është bërë ky ndryshim, azilkërkuesit nga këto vende (kryesisht nga Serbia e Maqedonia, të shumtën nga komuniteti rom) e anashkalojnë Zvicrën dhe janë orientuar nga Gjermania.

“Aktualisht po e shqyrtojmë mundësinë që procedurat e shkurtuara të zgjerohen edhe në vende tjera”, ka thënë drejtori i BFM, Mario Gattiker në një intervistë për gazetën “NZZ am Sonntag.

Sipas gazetës, këto vende, për fillim do të ishin Nigeria, Gana dhe Senegali.