Presidentja Leuthard viziton zonën e prekur nga rrëshqitja e dheut

Më e rëndësishmja është që të arrihet sa më shpejt kthimi në normalitet, në mënyrë që banorët e Bondos të kthehen sa më shpejt në shtëpitë e tyre, ka thënë presidentja Leuthard

Keystone

Presidentja e Federatës së Zvicrës Doris Leuthard ka vizituar sot zonën e prekur nga rrëshqitja e dheut në Bondo të kantonit Graubünden. Duke fluturuar me helikopter mbi këtë regjion, ajo ka fituar një pasqyrë në lidhje me situatën.

Tash duhet që të mbështetet popullata lokale që të përballojë këtë situatë, citojnë mediat zvicerane presidenten. Më e rëndësishmja është që të arrihet sa më shpejt kthimi në normalitet, në mënyrë që banorët e Bondos të kthehen sa më shpejt në shtëpitë e tyre, ka thënë Doris Leuthard, transmeton albinfo.ch

Më tutje Leuthard ka thënë se gjithnjë do të ketë këso rrëshqitjesh dheu, të shkaktuara nga ndryshimet klimatike. Por duhet të ndërmerret gjithçka që njerëzit të paralajmërohen për ekzistimin e këtyre dukurive.