Presidenti i Zvicrës: “Aspak pesimist lidhur me Trumpin”

Me rastin e një bashkëbisedimi telefonik me të, ai ia ka dalë që fare mirë ta vendosë Zvicrën në hartën politike të presidentit të ardhshëm të SHBA-së

Ndryshe nga pritjet skeptike kudo në botë në raport me presidentin e zgjedhur amerikan Donald Trump, presidenti zviceran i Federatës, Johann Schneider-Amman po tregon besim te ai.

Me rastin e një bashkëbisedimi telefonik me të, ai ia ka dalë që fare mirë ta vendosë Zvicrën në hartën politike të presidentit të ardhshëm të SHBA-së. Këtë e ka thënë Ammann në një intervistë të botuar sot në gazetën “Schweiz am Sonntag”.

Trump, sipas tij, ka shprehur respekt për Zvicrën dhe ka dashur të dijë më tepër lidhur me situatën në sferën e tregtisë, transmeton albinfo.ch gazetën e përmendur zvicerane.

“Unë nuk jam fare pesimist”, ka thënë Johann Schneider-Ammann, duke iu referuar Trump-it. Kjo edhe për faktin se, sipas tij, Trump ka mbledhur në Kabinetin e tij njerëz të cilët kanë udhëhequr koncerne të mëdha dhe të cilët kanë realizuar suksese “para së gjithash në hapjen e tregjeve të reja”. Dhe, tregjet e hapura përbëjnë për Zvicrën shansin e vetëm, ka përfunduar Ammann.