Policia vret personin që kishte sulmuar një grua

Sipas njohurive aktuale, përzgjedhja e banesës dhe viktima duket të jenë krejtësisht të rastësishme, thuhet në komunikatën e prokurorit publik

Në mesditën e të mërkurës, policia e qytetit të St. Gallenit ka ndaluar me të shtëna arme një 22-vjeçar i cili po godiste brutalisht  një grua 46-vjeçare me një objekt. Kjo u njoftua nga prokurori publik i St. Gallen të enjten, shkruan sda.ch.

I riu, i cili sipas mediave të ndryshme është zviceran, kishte hyrë në një apartament të një ndërtese banimi në Speicherstrasse, transmeton albinfo.ch. Aty ai ka filluar të godiste një grua 46-vjeçare (italiane) me një objekt të mprehtë. Sipas njohurive aktuale, përzgjedhja e banesës dhe viktima duket të jenë krejtësisht të rastësishme, thuhet në komunikatën e prokurorit publik.

Policët që kanë mbërritur në vendin e ngjarjes i kanë kërkuar personit në fjalë që të ndalonte. Por ai nuk e ka dëgjuar policinë dhe ka vazhduar me goditjet brutale mbi gruan. Dy nga  policët pastaj kanë drejtuar disa të shtëna me armë në drejtim të autorit të dyshuar.

I qëlluari me armë ka vdekur në vendin e ngjarjes, përcjell albinfo.ch. Gruaja është dërguar në spital me dëmtime të rënda në kokë, ku pastaj ka vdekur.

Rrethanat e veprës si dhe motivi i kryesit janë objekt i hetimeve të mëtejshme.

---