Policia maqedonase ndalon dhjetëra migrantë

Policia në Maqedoninë e Veriut ka zbuluar 53 migrantë të fshehur në një kamion, në rajonin kufitar juglindor.

“Shoferi i kamionit është arrestuar, pasi ai dyshohet të jetë pjesë e një bande trafikimi. Ai është shtetas maqedonas”, tha policia përmes një njoftimi.

Kamioni u ndalua gjatë një kontrolli rutinor në afërsi të qytetit Valandovë, që ndodhet në afërsi të kufijve të Maqedonisë së Veriut me Greqinë dhe Bullgarinë.

Migrantët, për të cilët besohet se kanë hyrë në vend në mënyrë të paligjshme nga Greqia, u dërguan në qendrat e paraburgimit në Shkup dhe në qytetin kufitar të Gjevgjelisë.

Ata pritet të deportohen përsëri në Greqi.

Në vitin 2015 është mbyllur ajo që quhej “Rruga Ballkanike”, të cilën mijëra migrantë e përdoren për të kaluar nga Greqia në vendet e Ballkanit Perëndimor dhe më pas në ato të Evropës Perëndimore.

Megjithatë, mijëra migrantë ende përpiqen ta bëjnë këtë rrugë, duke paguar kontrabandistët.

Policia e Maqedonisë së Veriut thotë se në tri javët e para të këtij viti janë zbuluar gjithsej 1.365 migrantë, që kishin hyrë në vend në mënyrë të paligjshme.

Vitin e kaluar, policia ndaloi më shumë se 24.500 migrantë të kalonin kufijtë në mënyrë të paligjshme, shkruan REL, përcjell Albinfo.ch.