Policia e St.Gallenit nuk mund të kontrollojë më “raserët”, mungon stafi

Bëhet fjalë për stacionet policore si Goldach, Wittenbach dhe Bad Ragaz, të cilat do të mbyllen përkohësisht nga 18 korriku

Për shkak të mungesës së stafit, policia kantonale e St.Gallenit duhet të mbyllë disa stacione policie, transmeton albinfo.ch. Për këtë arsye, kontrollet e shpejtësisë së makinave, ato të ngasësve “pozues” dhe të zhurmës në trafik  janë gjithashtu të reduktuara. Po ashtu edhe detyrat e zonave të prekura të përgjegjësisë, duke filluar nga e hëna do të merren nga komisariate të tjera.

Bëhet fjalë për stacionet policore si Goldach, Wittenbach dhe Bad Ragaz, të cilat do të mbyllen përkohësisht nga 18 korriku. Këto janë planifikuar të rihapen sërish  në vjeshtë, shkruan srf.ch.

Siç është raportuar nga policia e kantonit St.Gallen, aktivitetet e kaluara, si Forumi Ekonomik Botëror në Davos etj., kanë çuar në angazhim të stafit me punë jashtë orarit të rregullt të punës, përcjell albinfo.ch. Prandaj policia ndihet e detyruar t’i marrë këto masa sepse disa operacione që kërkojnë shumë kohë janë të nevojshme sërish në vjeshtë, kur do të ketë ngjarje të ndryshme sportive.

Policia kantonale garanton që ajo, përkundër të gjithave, do të mbetet gjithmonë plotësisht funksionale.

 

 

---