Plisat hapin sezonin motoristik

Dhjetëra motoristë shqiptarë të klubit „Plisat“, me seli në Zvicër, hapën sot sezonin motoristik. Për herë të parë bashkë me ta ishte i riu me prejardhje nga Prishtina, Arian Gjinolli. Për të ëndrra po bëhej realitet! Ai sot u pranua anëtar i klubit “Plisat” dhe bashkë me ta përjetoi defilimin e parë në grup me dhjetëra motoristë të tjerë shqiptarë të këtij klubi.

„Kjo ka qenë ëndrra ime, të kem motorin tim dhe ta ngas atë me fanellën e Plisave. Ky është një sport i veçantë dhe unë e dua shumë“, shprehet plot gëzim Ariani.

Verës do të dal me ta rrugëve të Kosovës, thotë ai. Do ta festojmë dhjetëvjetorin e klubit dhe si prishtinas, me fanellë të plisave, ndjehem i lumtur e krenar, tregon Ariani, herë shqip e herë gjermanisht.

Pavarësisht se shumica e tyre ndërmjet veti komunikojnë gjermanisht, kur i erdhi radha fotografive, ata lidhën duart në formë të shqiponjës dykrenore për të treguar prejardhjen e tyre që në anën tjetër e tregojnë edhe me mbajtjen e simbolit të modifikuar të emblemës së 100-vjetorit të shtetit shqiptar.
Ndryshe, klubi i motoristëve “Plisat” sivjet shënon 10-vjetorin e formimit të klubit me një organizim të madh humanitar në Kosovë.