Peticioni me 200 mijë nënshkrime i dorëzohet Presidentes

Presidentja e Kosovës, Atifete Jahjaga u bëri thirrjen të gjitha partive politike që t’i përgjigjen ftesës për dialog politik për të tejkaluar situatën e krijuar në Kuvend

Tri partitë politike që kanë formuar tashmë frontin opozitar i kanë dorëzuar presidentes së Kosovës Atifete Jahjaga, peticionin me 200 mijë nënshkrime, që kundërshtohet Marrëveshja për Demarkacionit të kufirit shtetëror ndërmjet Kosovës dhe Malit të Zi dhe Marrëveshjen për themelimin e Asociacionit të komunave serbe në Kosovë.

Peticionin e dorëzuan, Glauk Konjufca nga Lëvizja Vetëvendosje, Pal Lekaj nga Aleanca për Ardhmërinë e Kosovës dhe Valdete Bajrami nga Nisa për Kosovën.

Sipas një komunikate lëshuar nga Presidenca, thuhet se presidentja Jahjaga u ka thënë përfaqësuesve opozitarë, se në përputhje me kompetencat e saj kushtetuese dhe pa paragjykim, ajo tashmë i është drejtuar Gjykatës Kushtetuese për të kërkuar interpretimin e përputhshmërisë së parimeve të Asociacionit me Kushtetutën e Republikës së Kosovës, dhe pret nga gjykata.

“Presidentja Jahjaga përsëriti thirrjen e saj që i tërë spektri politik i Kosovës t’i përgjigjet ftesës së saj për dialog politik për të tejkaluar situatën e krijuar në vend”, thuhet në njoftim.

Ndryshe, herën e parë opozita e futi dhunshëm në Kuvend peticionin, por këtë nuk e morën për bazë, madje ishte kryeparlamentari Kardi Veseli që tha se në Parlament nuk ka ardhur kurrfarë peticioni. Ndërsa zëvendëskryeministri Hashim Thaçi tha se peticioni është i falsifikuar

Pavarësisht këtyre deklaratave, tri partitë opozitare kanë zhvilluar një peticion nëpër të gjitha qytetet e Kosovës, të cilën e kanë nënshkruar më shumë se 200 mijë qytetarë. Ata janë deklaruar kundër Asociacionit të Komunave serbe dhe kundër Marrëveshjes për demarkacionin e kufirit me Malin e Zi.