Pesë fish më të shtrenjta shpenzimet mjekësore për dëbimin e refugjatëve

Kompanitë ajrore kërkojnë gjithnjë e më shpesh nga organizatorët e dëbimeve, që të sigurojnë paraprakisht përcjelljen mjekësore për personat e dëbuar

Shpenzimet që dalin për përkujdesjen mjekësore me rastin e dëbimit të të huajve nga Zvicra përmes rrugës ajrore, janë pesëfishuar. Kjo ka ardhur si pasojë e faktit se gjithnjë e më tepër azilkërkues të dëbuar kanë nevojë për përkujdesje mjekësore, shkruan srf.ch duke iu referuar autoriteteve federale, kompetente në këtë fushë.

Kompanitë ajrore kërkojnë gjithnjë e më shpesh nga organizatorët e dëbimeve, që të sigurojnë paraprakisht përcjelljen mjekësore për personat e dëbuar, përcjell albinfo.ch. Nga ana tjetër edhe mjekët, të cilët i kanë kontrolluar më parë personat që duhej të dëboheshin, gjithnjë më shpesh vendosin për detyrimin që një mjek të jetë gjithsesi në bord në rastet e tilla.

Gjashtë vite më parë kishte vdekur një person me rastin e dëbimit dhe, ky rast fatkeq kishte ndikuar që të ashpërsoheshin rregullat sa u përket masave të përkujdesjes shëndetësore.