Përurohet rruga “Ibrahim Rugova” në Tiranë

Kryeministri Berisha e vlerësoi figurën e ish-Presidentit të Kosovës Ibrahim Rugova, si njeriu që i dha udhë Pavarësisë

Kosova sot është në festë, ndërkohë që gëzimit të saj i bashkëngjitet e gjithë Shqipëria. Në katër vjetorin Pavarësisë së Kosovës ,Tirana i dha një rruge në kryeqytet, pranë zonës së Shallvareve, emrin “Ibrahim Rugova”. Bashkia e Tiranës me këtë rast priti sot kreun e Komunës së Prishtinës Isa Mustafa. Në ceremoninë e emërimit ishte i pranishëm edhe kryeministri Berisha, njofton BW.

Kryeministri Berisha i pranishëm në ceremoninë e emërtimit të rrugës “Ibrahim Rugova”, e cilësoi datën 17 shkurt të vitit 2008, si ditën më të ndritur për shqiptarët ndër shekuj, ndërsa vlerësoi figurën e ish-Presidentit të Kosovës Ibrahim Rugova, si njeriu që i dha udhë Pavarësisë.

Berisha tha se shqiptarët shkojnë në 100-vjetorin e Pavarësisë më krenar dhe më të sigurt për të ardhmen.

“Ibrahim Rugova me veprën e tij, me përkushtimin e tij të plotë, me guximin e jashtëzakonshëm bëri të mundur që shqiptarët të vinë në këtë 100 vjetor krenarë, të lirë, të siguritë në të ardhmen që meritojnë”, tha kryeministri.

Kreu i Komunës së Prishtinës Isa Mustafa u shpreh i privilegjuar që Shqipëria në katër vjetorin e Pavarësisë inauguron në kryeqytetin e saj një rrugë në nder të presidentit historik të Kosovës, Ibrahim “Rugova.

Kreu i Komunës së Kosovës, tha se Rugova u bë emblema e përpjekje të Kosovës për liri dhe pavarësi, ndërkohë çështjen e Kosovës e ktheu në çështje ndërkombëtare.

“Ibrahim Rugova hyri në politikë në periudhë të vështirë, ai u bë emblema e përpjekjeve për liri dhe Pavarësinë e Kosovës, dhe çështjen e Kosovës e ktheu në çështje ndërkombëtare. Ky vizion u bë platformë nacionale e gjithë Kosova tani e Republikës së Kosovës”,- u shpreh Mustafa.

Kryebashkiaku i Tiranës, Lulzim Basha gjatë ceremonisë së emërimit të rrugës ‘Ibrahim Rugova’ në kryeqytet, në zonën pranë Shallvareve u shpreh i lumtur që në 4 vjetorin e Pavarësisë kombi shqiptar i bashkëngjitet festimeve të Kosovës.

Basha u shpreh se Rugova ishte i vetmi që artikuoi idenë për pavarësi dhe liri, nën dhunën dhe terrorin serb.

“Ne përulemi para emrit dhe veprës së Ibrahim Rugovës. Ai është simbol i përpjekjeve të Kosovës për Pavarësi, kur të paktët e artikulonin idenë nën dhunën dhe terrorin serb. Qytetarët e Tiranës dhe unë ndjehemi të nderuar se një prej rrugëve të kryeqytetit tonë do mbajë emrin Ibrahim Rugova”,- u shpreh kryebashkiaku i Tiranës.