Përmbytjet sfidojnë Shqipërinë

Reshjet e shiut dhe shkrirja e borës nëpër zonat malore ka rritur dukshëm nivelin e ujit nëpër lumenj e përroska, duke shkaktuar përmbytje të mëdha në Republikës e Shqipërisë. Përmbytje ka pasur edhe në autostradën “Rruga e Kombit” ku më së keqi ka pësuar një bashkatdhetarë nga Kosova, i cili për orë të tëra ka mbetur në baltë.

Bashkatdhetari me një Mercedes me targa gjermane, së bashkë me gruan dhe fëmijët po kthehej në vendin e punës, por brenda 25 sekondash, siç ka deklaruar ai, e ka mbuluar balta, që ka rrëshqitur nga anash.

Fotot e këtij bashkatdhetari i ka plasuar “Jeta Osh Qef” e cila gjithashtu ka ironizuar me kreun e Partisë Demokratike, Lulzim Basha, që ishte ministër Transporti në kohën kur u ndërtua rruga.

Ministria e Bujqësisë në Qeverinë e Shqipërisë ka raportuar për dëmet e shkaktuara në bujqësi në mbarë vendin, si pasojë e përmbytjeve. Sipas ministrisë në disa fshatra ujërat kanë dëmtuar sipërfaqe të konsiderueshme toke të mbjellë, ndërsa uji ka dëmërtuar në qindra hektarë tokë.

Vetëm në rrethin e Durrësit ndodhen rreth 180 hektarë nën ujë, në Krujë, sipërfaqja e tokave nën ujë është 620 hektarë.

Përveç “Rrugës së Kombit”, edhe rruga Elbasan-Librazhd është dëmtuar dukshëm nga reshjet, madje njëra korsi është mbyllur.

Ditën e sotme, ministri i Transporteve dhe Infrastrukturës, Edmond Haxhinasto, ka inspektuar rrugën Elbasan-Librazhd, pas situatës së krijuar si pasojë e reshjeve të dendura të shiut dy ditë më parë. Si pasojë e rrjedhjes së rrëmbyer të ujit të lumit Shkumbin, u shemb një pjesë e rrugës Elbasan-Librazhd, duke penguar edhe qarkullimin e mjeteve.

Ministri Haxhinasto është shprehur se, “ky fakt tregon për cilësinë e dobët të punimeve në ndërtimin e rrugës”.

“Doli në pah cilësia e dobët e punimeve. Do të hetohet për këtë fakt, dhe do të presim mendimin e ekspertëve. Do të kryejmë hetime për të nxjerrë papërgjegjësitë, si dhe do të kryhet një ndërhyrje për të rregulluar këtë dëmtim”, deklaroi Haxhinasto.

Ndryshe, reshjet e shiut kanë shkaktuar vërshime dhe dëme të konsiderueshme materiale edhe në Republikën e Kosovës. Atje disa lumenj kanë dalë nga shtrati, ndërsa vetëm në komunën e Malishevës, janë shkaktuar dëme të mëdha në infrastrukturë, por edhe në tokën bujqësore.