Përkundër pandemisë, Migros-i e mbylli vitin 2020 me qarkullim rekord

"Boom"-i i përjetuar gjatë kësaj periudhe në tregtinë përmes internetit dhe lulëzimi i biznesit me pakicë kanë tejkaluar ndjeshëm humbjet masive në sferat tjera

Pavarësisht nga pandemia e koronës, gjiganti i tregtisë me pakicë në Zvicër, Migros, gjatë vitit të kaluar ka shënuar rritje. Shitjet janë shtuar për 4 për qind duke arritur në shifrën prej29.8 miliardë frangash zvicerane, njofton shitësi Migrosi.

Dhe, ky është një rekord i deritashëm për shitësin me pakicë, shkruan srf.ch.

“Boom”-i i përjetuar gjatë kësaj periudhe në tregtinë përmes internetit dhe lulëzimi i biznesit me pakicë kanë tejkaluar ndjeshëm dhe kanë kompensuar humbjet masive në sferën e biznesit të turizmit, hotelierisë, fitnesit dhe atij të kohës së lirë, shkruan Migros në një komunikatë.

“Gjiganti i portokalltë”, siç njihet ndryshe Migros-i, ka përjetuar rritjen më të madhe në tregtinë në internet, transmeton albinfo.ch. Këtu shitjet janë rritur për 31 për qind duke arritur në gati 3 miliardë franga.

Në veçanti, platforma online Digitec Galaxus ka shënuar një rritje prej mbi 50 për qind duke u ngjiturb në 1.7 miliard franga, përcjell albinfo.ch.

Supermarketi i Internetit Migros Online (ish “LeShop”) gjithashtu ka kontribuuar në mënyrë të konsiderueshme në rritjen e përgjithshme, duke u rritur vetë për 40 për qind.

Operatori turistik Hotelplan, pjesë e Migros-it kishte vitin më të zi në historinë e tij, transmeton albinfo.ch. Shitjet e tij kanë rënë për 38 për qind duke ngelur në 732 milion franga për shkak të kufizimeve të udhëtimit.

---