Për kontrolle më të rrepta të kamionëve që udhëtojnë në Zvicër

KEYSTONE

Të ballafaquar me parregullsitë e vazhdueshme, ASTAG, shoqata ombrellë e transportuesve zviceranë dhe Iniciativa Alpine kanë bërë thirrje për më shumë inspektime të kamionëve që udhëtojnë në Zvicër.

Në vitin 2016 për 34.000 kamionë të kontrolluar, autoritetet kanë gjetur më shumë se 17.000 vepra penale, tregojnë të dhënat statistikore të shpallura javën e kaluar. Duhet pasur parasysh se për një kamion të vetëm mund të ketë disa vepra penale. Megjithatë, statistikat, të cilat prekin kryesisht automjetet e huaja, shqetësojnë shoqatat që avokojnë për transport nëpërmjet hekurudhave.

Sa për kujtesë, Mathias Reynard ka paraqitur një interpelancë në Këshillin Federal në dhjetor. Këshilltari nacional socialist i Valais pati kërkuar që “të shqyrtohen kontrollet e zbatuara sipas konceptit për intensifikim të kontrollit të trafikut”, të paraqitur në vitin 2003 nga Zyra Federale e Rrugëve.

I zgjedhuri beson se është koha për të bërë një bilanc rreth efekteve të ndërmarra. Ai do të kërkojë në seancën e ardhshme të Këshillit Nacional një kontroll më të madh, duke përfshirë edhe masat për antindotje.

Për Jon Pult, president i Iniciativës Alpine, kamionët mund t’i shmangen shumë lehtë ligjit. Sot është shumë e lehtë të udhëtosh pa respektuar kohën e pushimit të detyrueshëm, të kesh frena të dëmtuar, etj.

Sipas Jean-Daniel Faucherre, “këta njerëz kalojnë nëpërmjet Zvicrës dhe ndotin vendin tonë”.