Për Juso-n, martesa është një “model që i ka ikur koha”

Keystone

Kryesia e Juso-s (Socialistët e rinj) ka miratuar sot qëndrimin sipas të cilit martesa ose jeta në çift është diçka që po i kalon koha dhe që duhet të reformohet ose të hiqet krejtësisht. Me këtë qëndrim, kreu i kësaj organizate do të dalë në kuvendin delegues që mbahet më 20 qershor në Gjenevë.

“Feminizmi borgjez predikon se femrat mund të arrijnë të gjitha, mjafton që ta duan këtë. Por ky feminizëm e injoron me vetëdije faktin se seksizmi është tejet profitabil. Për këtë arsye, në kapitalizëm nuk mund të ketë barazi të vërtetë gjinore. Vetëm feminizmi socialist mund të luftojë në mënyrë konsekuente kundër seksizmit dhe për lirinë e gruas”, thuhet në qëndrimin e Juso-s që është publikuar në gazetën “Schweiz am Sonntag”.

Feminizmi në shekullin 21 duhet t`i përfshijë edhe komunitetin LGBT. Për këtë arsye Juso kërkon që institucioni i martesës të bëhet menjëherë i hapur për të gjitha çiftet e të gjitha gjinive dhe konstelacioneve si dhe që çiftet e pamartuara të barazohen me ato të martuara. Në një afat më të gjatë, martesa është madje një model i tejkaluar, që Juso e kundërshton.