Pehlivanët sfiduan motin me shi

Shqiptari Xhezair Latifi dhe turku Muhamed Okaj e ndanë vendin e parë në garën që e ndoqën mbi 3000 shikues

Të dielën që shkoi janë mbajtur në Weinfelden të kantonit Thurgau takimet e 12-a ndërkombëtare të Pehlivanëve. Në këto gara të sportit tradicional të mundësve morën pjesë garues nga, Shqipëria, Maqedonia, Kosova dhe Turqia.

Ndonëse mbretëronte mot me shi, në stadiumin ku po mbaheshin garat kishin ardhur mbi 3000 shikues për tu kënaqur me mjeshtrinë e mundësve që në popull njihen si pehlivanë.

Publikun dhe garuesit i ka përshëndetur edhe konsulli i Republikës së Kosovës në Cyrih, dr. Sali Sefa.

Garat u zhvilluan në tri kategori sipas peshave, ndërsa gara më interesante ishte ajo mes garuesit nga Maqedonia Xhezair Latifi dhe turkut Muhamed Okaj. Këta dy të fundit, pasi që në finale dolën të barabartë, e ndanë vendin e parë.

Refer kryesor ndërkombëtar ishte Ali Topallogullari nga Turqia.

Sikurse edhe herëve tjera, organizator dhe sponsor kryesor i garave ka qenë Samet Hyseni nga Qegrani i Gostivarit, afarist në Zvicër. Po kështu pati edhe disa donatorë, shqiptarë dhe zviceranë.

I pranishëm në këtë manifestim ishte edhe piloti shqiptaro-amerikan James Berisha, ndërsa moderimin e bëri Dashnim Hebibi.

Siç e do atmosfera e garave të pehlivanëve që e njohim edhe nga tradita në Kosovë dhe në trojet tjera shqiptare, i gjithë aktiviteti u përcoll nga orkestra popullore me zurlë e tupana.

Prania në këtë manifestim e shoqatës së motoristëve “Plisat” i dha edhe më shumë hijeshi gjithë atmosferës në stadium.

Foto Galeri