Pasi u dëbua nga Shqipëria, Harun Çelik del para gjykatës turke

Është bërë e ditur se Gjykata në Turqi ka vendosur të lërë në burg të akuzuarin si pjesëmarrës në organizata terroriste, Harun Çelik, i cili dy ditë më parë u deportua nga Shqipëria në Turqi.

Thuhet se Gjykata vendosi masën e paraburgimit me akuzat për “pjesëmarrje si anëtar në organizatë të armatosur terroriste”.

Po ashtu, Çelik më herët ka qenë i dënuar disa muaj në Shqipëri, i cili u arrestua në aeroport si i akuzuar për veprat penale “falsifikim i letërnjoftimeve, i pasaportave ose i vizave” dhe “falsifikim i dokumenteve”.

Duhet theksuar se Harun Çelik nuk ka punuar asnjë ditë në Shqipëri dhe ka ardhur në vendin tonë vetëm për ta përdorur si mundësi kalimi drejt një vendi perëndimor.

Mirëpo, polica shqiptare e zbuloi dhe e arrestoi. Ai bëri burg deri në 1 janar kur u lirua. Ai u dëbua menjëherë dhe u dorëzua tek antiterrori turk.

Avokati i tij, Alban Bengasi, i tha ABC News se Harun Çelik nuk ishte njoftuar për dëbimin, siç ligji e kërkon, dhe për këtë arsye ai nuk kishte pasur mundësi të bënte ankim, përcjell albinfo.