Pas vendimit të Gjykatës Kushtetuese, “vlojnë” reagimet në Kosovë

Opozita kërkon dorëheqjen e qeverisë e cila, sipas tyre ka mashtruar popullin, ndërsa Qeveria këmbëngulë se marrëveshja do të jetësohet, por me pak ndryshime. Reagon BE dhe Beogradi

Interpretimi i Gjykatës Kushtetuese se Marrëveshjes për Asociacionin e komunave me shumicë serbe nuk është në harmoni të plotë me Kushtetutën e Kosovës, ka ngjallur një momentum të ri në politikën kosovare. Opozita pas këtij vendimi kërkoi dorëheqjen e Qeverisë e cila, sipas tyre ka mashtruar popullin, ndërsa Qeveria këmbëngulë se  marrëveshja do të jetësohet, me pak ndryshime.

Për vendimin djeshëm të Gjykatës Kushtetuese të Kosovës, ka reaguar edhe bashkësia ndërkombëtare e cila kërkon nga palët të respektohet vendimi i Gjykatës, dhe qeverisa e Serbisë, që këtë vendim e quan politik.

Në mbledhjen e Qeverisë së Kosovës sot ka folur edhe ministrja për Dialog, Edita Tahiri, e cila tha se Marrëveshja për Asociacionin e Komunave Serbe nuk u anulua nga Gjykata Kushtetuese dhe asnjë pikë e saj nuk u kërkua që të shkojë në rinegocim.

Kryeministri Isa Mustafa tha se vendimi i Gjykatës Kushtetuese do të respektohet, ndërsa kërkoi nga opozita që të kthehet në Kuvend. “Pas kësaj nuk ka asnjë arsye të mëtejshme për bllokim të punës së kuvendit e as për protesta në rrugë. Ky vendim siguron se në procedura të mëtejshme do të veprohet brenda kornizave të Kushtetutës”, tha ai.

Përfaqësuesi i Posaçëm i BE-së në Kosovë, Samuel Zhbogar pret që të gjitha palët ta respektojnë këtë vendim ashtu që akti ligjor i Qeverisë së Kosovës për zbatim të kësaj Marrëveshjeje dhe Statuti pasues të përgatiten sa më shpejtë që është e mundur.

Pas vendimi është përgjigjur e para e shtetit, Atifete Jahjaga. Ajo u ka bërë thirrje subjekteve politike në pushtet dhe atyre në opozitë që të shfrytëzojnë këtë moment për të rinisur dialogun politik në Kosovë dhe për të rikthyer normalitetin në vend.
Ndërsa, kryeparlamentari Kadri Veseli thotë se Republika e Kosovës është demokraci kushtetuese dhe mbi bazën e këtij parimi fundamental, do të respektohet vendimi i Gjykatës Kushtetuese.

“Ky vendim përbën një moment të ri dhe të rëndësishëm për skenën politike në Kosovë. Ai krijon një hapësirë të re për reflektim të përbashkët dhe për qasje të përbashkët ndaj dialogut politik, si rruga e vetme për të hequr dilemat e ngritura dhe për të garantuar stabilitetin politik e institucional të vendit”, thotë Veseli.

Menjëherë kanë reaguar tri partitë politikë që përbejnë bllokun opozitare, Lëvizja Vetëvendosje, AAK dhe Nisma. Opozita kërkon dorëheqjen e Qeverisë, për mashtrimin, siç thonë ata, që ia kanë bërë popullit.

“Isa Mustafa dhe Hashim Thaçi, si dhe koalicioni i tyre duhet të japin përgjegjësi për shkelje të Kushtetutës. Këta shkelën Kushtetutën dhe mashtruan qytetarët duke u përpjekur ta fshihnin këtë mashtrim. Po ashtu, ata kanë vënë në lajthitje Kuvendin e Republikës, duke tentuar dhunshëm ta bëjnë atë pjesë të shkeljes së tyre të rëndë”, konsideron opozita.

Mustafa dhe Thaçi, sipas opozitës, me qëndrime antikushtetuese shpërfillën Peticionin e 205 254 qytetarëve, arrestuan deputetët opozitarë, aktivistët e qytetarët protestues.
“Ata na akuzuan se po shkelim ligjin teksa kishin shkelur thelbësisht Kushtetutën e vendit tonë, pra interesin tonë shtetëror. Prandaj largimi i menjëhershëm i Mustafës dhe Thaçit është i domosdoshëm dhe më e pakta që duhet të ndodhë”, konsiderojnë opozita e bashkuar.

Po ashtu për vendimin që dha Gjykata Kushtetuese e Kosovës, ka reaguar edhe Beogradi zyrtar.

Milovan Drecun, kryetar i Këshillit të Kuvendit të Serbisë për Kosovën shprehet  kategorik se kurrfarë bisedimesh të reja lidhur me Asociacionin e Komunave serbe nuk vijnë në konsiderim për t’u zhvilluar në Bruksel. Ai konsideron, se “këto bisedat janë dëshira të vitit të ri të disa politikanëve kosovarë, ndërsa shton se Marrëveshja duhet të zbatohet”.

“Ata (Prishtina) janë të detyruar të respektojnë marrëveshjen ashtu si është arritur dhe aty shmangie nuk ka. Nëse diçka nuk është në përputhje me Kushtetutën, atëherë duhet të ndryshohet Kushtetuta. Nëse Brukseli kërkon që për Marrëveshjen tashmë të arritur të bisedohet sërish, atëherë ky do të ishte një hap i madh prapa dhe ky proces do të ishte pa perspektivë”, ka thënë Drecun.

Gjykata Kushtetuese e Kosovës në përgjigjen e saj ndaj kërkesës së presidentes Atifete Jahjaga, për të vlerësuar Marrëveshjen e 25 gushtit, konstaton se Marrëveshja për themelimin e Asociacionit të Komunave me shumicë Serbe nuk është tërësisht në harmoni me Kushtetutën e Kosovës.

Gjykata Kushtetuese ka konstatuar se Asociacioni i Komunave me shumice Serbe do të themelohet, siç është paraparë me Marrëveshjen e parë të viti 2013, të ratifikuar nga Kuvendi i Kosovës dhe shpallur nga Presidentja e Kosovës.

---