Pas vdekjes së punëtorit në Prizren, sindikatat kërkojnë siguri në punë

Bashkimi i Sindikatave të Pavarura të Kosovës ka bërë thirrje për rritjen e sigurisë në vendet e punës, pas vdekjes së një punëtori në Prizren.

Kryetari i BSPK-së, Atdhe Hykolli, në një postim në Facebook u ka kërkuar autoriteteve të marrin masa e të rritet siguria në vende të punës.

“Në këtë moment të trishtë e në kujtim të punëtorit Shpejtim Gashi, ne, Bashkimi i Sindikatave të Pavarura të Kosovës, kërkojmë një hetim të hollësishëm mbi ngjarjen që ka ndodhur dhe kërkojmë përgjegjësi për çdo shkelje të ligjit që mund të ketë ndodhur. Kjo është e detyrueshme për të mbrojtur të drejtat dhe sigurinë e të gjithë punëtorëve tanë”, ka shkruar Hykolli, përcjell albinfo.ch.

Është kërkuar reagim i menjëhershëm nga Qeveria.

“Po ashtu duam t’ia përkujtojmë partnerit tonë social – Qeverisë që është detyrimi i saj kushtetues të mbroj jetën dhe të drejtat e qytetarëve tanë, përfshirë këtu edhe punëtorët. Kërkohet një ndërhyrje e menjëhershme për të adresuar çështjet e sigurisë në vendet e punës dhe për të siguruar se punëtorët kanë mundësi të sigurojnë një jetë të denjë dhe të sigurt për familjet e tyre. Familja e punëtorit të humbur dhe miqtë e tij janë në mendjet dhe zemrat tona në këtë moment të vështirë. Ne përcjellim ngushëllimet tona më të sinqerta dhe mbështetjen tonë më të madhe për ta. Ndihma dhe solidariteti ynë për ta do të jetë konstant. Në emër të të gjithë sindikalistëve shprehim ngushëllimet tona më të thella dhe respektin ndaj Shpejtimit”, është thënë nga Hykolli, përcjell albinfo.ch.