Pas një muaji, gjykata serbe liron nënkolonelin e policisë kosovare

Nënkolonel Nehat Thaqi ka thënë se ndihet krenar për punën që kanë bërë institucuionet e Kosovës për lirimin e tij. Ai qëndroi 30 ditë në paraburgim në Beograd

Pas një muaji në paraburgim, autoritetet serbe kanë liruar nënkolonelin e Policisë së Kosovës Nehat Thaqin. Ai u akuzua për krime lufte, ndërsa u arrestua në fund të muajit shtator në pikëkalimin «Dheu i Bardh» në mes Kosovës dhe Serbisë, gjatë përpjekjes për ta kaluar territorrin serb si transit.

Ai është liruar gjatë ditës së sotme, ndërsa në mbrëmje me ndihmën e Zyrës së Kosovës në Beograd u kthye në atdhe. Pasi ka arritur në Kosovë, nënkolonel Thaqi ka thënë se ndihet krenar për punën që kanë bërë institucuionet e Kosovës për lirimin e tij, shkruan Express.

“Po i ndaj me ju dy komente. Jam ndjerë krenar në burgjet e Serbisë kur në lajme kam dëgjuar se institucionet e Kosovës po angazhohen për qytetarët e tyre. Që nga nesër unë do të mundohem t’ia kthej borxhin këtij vendi”, deklaroi Thaqi.

Mediat serbe kanë shpjeguar edhe arsyet për lirimin e Thaqit. Sipas tyre, Thaqi i cili akuzohet për përndjekjen e një familjeje serbe nga Lipjani, nuk është akuzuar nga dëshmitarët, prandaj edhe kanë pushuar hetimet. Për lirimin e tij edhe Kuvendi i Kosovës kishte nxjerr një rezolutë.

Mirëpo, në ditën kur u lirua nënkoloneli i Policisë kosovare, në media u kumtua lajmi për arrestimin e një kosovari tjetër, Hilmi Kelmendi, ish gueril i UÇK-së. Hilmiu, i cili po mbahet në qendrën e paraburgimit në Beograd, ishte me qëndrim të përhershëm në Gjermani, por ende nuk e kishte fituar shtetësinë.

Për rastin deri më tash ka reaguar vetëm Ministria e Jashtme e Kosovës, e cila u ka bërë thirrje shqiptarëve të Kosovës që të shmangin kalimin nëpër Serbi në këtë kohë.