Paralizohet qarkullimi i trenave në linjën Cyrih-Bernë

Ndërkohë, pas disa orëve bllokimi, ka filluar sërish lëvizja e trenave në këtë linjë që është më e rëndësishmja në nivel nacional. Por, ky qarkullim është ende i kufizuar

Një çrregullim në qendrën e udhëheqjes elektrike të trenave në stacionin Hekurudhor në Schlieren (Cyrih) ka paralizuar gjithë qarkullimin e trenave në relacionin Cyrih-Bernë.

Ndërkohë, pas disa orëve bllokimi, ka filluar sërish lëvizja e trenave në këtë linjë që është më e rëndësishmja në nivel nacional, shkruajnë mediat zvicerane. Por, ky qarkullim është ende i kufizuar ndërsa SBB/CFF (Ndërmarrja Federale e Hekurudhave) nuk jep ndonjë shpjegim lidhur me shkaqet e defektit, transmeton albinfo.ch

Nga paraliza ishin prekur të gjitha linjat nga Cyrihu përmes Lenzburgut drejt Oltenit dhe shumica e linjave regjionale (S-Bahn) në mes Cyrihut dhe Kantonit Aargau.

Pasagjerët që udhëtojnë nga Cyrihu në Bernë, SBB i ka udhëzuar që të devijojnë duke marrë trenin nga drejtimi i Lucernit ose trenin regjional S6 përmes luginës Furttal.