“Panagjyri i Gjilanit”, organizim për nder të diasporës

Me ardhjen e mërgimtarëve Komuna e Gjilanit do të angazhohet me të gjitha kapacitetet për të pasur ata një pritje dhe qëndrim dinjitoz.

Kështu ka premtuar numri një i komunës së Gjilanit, Lutfi Haziri.

Këtë vit ardhja e mërgimtarëve dhe qëndrimi i tyre në vendlindje do të ketë një tretman më ndryshe.

„Për nder të diasporës do të ketë ditë të veçanta për ta, ku ata do të kenë mundësi të vizitojnë institucionet e komunës, do të ketë manifestime, programe e aktivitete nga më të ndryshmet, me të vetmin qëllim që ata të ndihen komod dhe të relaksuar në vendlindje”, tha për rajonipress Lutfi Haziri.

“Zemra e komunës është pranë diasporës, duke organizuar aktivitete të ndryshme kulturore, muzikore e sportive. Diaspora do të ndihet e relaksuar sikur në shtëpinë e saj dhe ne do të kujdesemi me mundësitë tona buxhetore që diasporën ta mbajmë të gjallë”, tha Haziri.

Llogaritet se vetëm komuna e Gjilanit ka në diasporë rreth 30 mijë qytetarë të saj. Regjistrimi i fundit i popullsisë ka dëshmuar se në Gjilan më se 6 mijë shtëpi janë të zbrazta.