Më shumë se gjysma e popullsisë zvicerane, e kënaqur me qeverinë

(KEYSTONE/Lukas Lehmann)

Ministrja e Mbrojtjes, Viola Amherd dhe ministri i Brendshëm, Alain Berset, janë anëtarët më të vlerësuar të Këshillit Federal shtatanëtarësh, sipas një sondazhi, përcjell albinfo.ch.

Amherd kryeson renditjen e vlerësimit të publikut me një rezultat 4.17/6, ndërsa Berset ndjek nga afër me 4.15/6, shkruante të hënën grupi Tamedia dhe gazeta 20 Minuten.

Albert Rösti, i cili mori portofolin e mjedisit, energjisë dhe transportit në fillim të vitit, është i treti me 4.02.

Katër anëtarët e tjerë janë ministrja e Financave, Karin Keller-Sutter (3.89), ministri i Ekonomisë, Guy Parmelin (3.77), ministri i Jashtëm, Ignazio Cassis (3.57) dhe ministrja e Drejtësisë, Elisabeth Baume-Schneider (3.42).

Sondazhi i mbi 25,000 njerëzve zbuloi gjithashtu se kënaqësia e publikut me politikanët zviceranë ka rënë paksa në krahasim me shkurtin e këtij viti.

Kënaqshmëria me punën e Parlamentit ra me dy pikë përqindje në 48%, ndërsa për qeverinë shifra ra një pikë përqindje në 54%, përcjell tutje albinfo.ch.