Pa i përmbushur kriteret, s’ka viza

BE vazhdon të insistojë tek autoritetet e Kosovës për t’i përmbushur kriteret që mundësojnë liberalizimin e vizave për qytetarët e Kosovës

Drejtoresha për Evropën Perëndimore, Angjelina Ainhost ka qëndruar të enjten në Prishtinë. Ajo në takimin që ajo pati me kryetarin e Kuvendit të Kosovës, Kadri Veselin dhe kryeministrin Ramush Haradinaj, ua kujtoi kriteret që BE kërkon nga Kosova, raporton televizioni publik i Kosovës.

BE vazhdon të insistojë tek autoritetet e Kosovës për t’i përmbushur kriteret që mundësojnë liberalizimin e vizave për qytetarët e Kosovës, përcjell albinfo.ch.

Ky ishte edhe theksi i vizitës që i bëri Kosovës drejtoresha për Evropën Perëndimore, Ballkanin Perëndimor dhe Turqinë në Shërbimin e Jashtëm Evropian, Angelina Eichhorst.

Gjatë takimit me kreun e Kuvendit të Kosovës, Kadri Veseli, u diskutua për zhvillimet aktuale në Kosovë, procesin e integrimit evropian të saj dhe hapat që duhet ndërmarrë në këtë proces.

Ndërkohë, nga zyra e kryeministrit e Kosovës është bërë e ditur se gjatë takimit, kryeministri Haradinaj ka thënë se me ndryshimet në komisionin për çështjen e demarkacionit, procesi do të lëvizë shpejt dhe do të jetë plotësisht transparent.

Po ashtu, bëhet e ditur se Haradinaj ka theksuar se Kosova do t’i përmbushë obligimet e saj bazuar në marrëdhënien kontraktuese me BE-në dhe theksoi rëndësinë që ka për qytetarët e vendit lëvizja e lirë dhe pa viza.