Osmani pritet nga kryediplomati gjerman, Maas

Flasin për njohjen e patentshoferëve

Në kuadër të vizitës zyrtare në Gjermani, presidentja Vjosa Osmani është pritur nga ministri i Punëve të Jashtme i Gjermanisë, Heiko Maas.

“Vlerësova lart marrëdhëniet ndërmjet dy vendeve tona dhe e konfirmova përkushtimin tonë për thellimin e raporteve kosovaro-gjermane. Sa i përket iniciativave rajonale, theksova se Procesi i Berlinit është shtysë e fuqishme për perspektivën evropiane të Ballkanit Perëndimor, duke përjashtuar çdo ide tjetër që synon vonimin e integrimit në BE dhe është në shpërputhje me parimin e gjithëpërfshirjes”, shkruan Osmani, transmeton Albinfo.ch.

Ajo tha se me kryediplomarin gjerman diskutuan edhe për çështje, të cilat ndikojnë në afrimin e mëtejmë të popujve, ekonomive dhe tregjeve tona, me ç’rast vuri theksin në nevojën për përfundimin e shpejtë të marrëveshjes dypalëshe për njohjen e patentshoferëve të Kosovës, nevoja për marrëveshjen për transportin e mallrave, si dhe heqja e taksimit të dyfishtë midis dy vendeve.

“Lidhur me procesin e dialogut me Serbinë, ritheksova se rezultati përfundimtar duhet të jetë njohja reciproke dhe ruajtja e rregullimit aktual kushtetues në Kosovë, sikurse edhe e kufijve të tashëm”, thekson Osmani në statusin e saj.

---