Opozita: Lëvizja studentore, leksion për të gjithë

Kryetarja e Lëvizjes Socialiste për Integrim, në një takim që ka pasur me strukturat e Lëvizjes së Gruas për Integrim ka komentuar protestat masive të organizuara ditët e fundit në Tiranë nga studentët, duke thënë se ajo nuk është e një partie politike, transmeton albinfo.ch.

“Lëvizja studentore është një lëvizje kombëtare. Me lëvizjen studentore nuk mund të luajë askush. Lëvizja studentore është një realitet për të dhënë mësim. Lëvizja studentore është lëvizje e PS-së, PD-së dhe atyre pa parti. Lëvizja studentore nuk është një parti politike, ashtu si ato grupet e paguara nga Rama për t’i përçarë”, u shpreh Kryemadhi.

Më tej ajo shton se studentët i dhanë një leksion asaj dhe të gjithë politikanëve. Po ashtu 8 Dhjetori, Dita e Rinisë, ka mbledhur anëtarët e Partisë Demokratike në ambientet e Qytetit Studenti, aty ku 28 vjet më parë filloi edhe lëvizja studentore që solli edhe rrëzimin e diktaturës komuniste, e pluralizmin në Shqipëri.

Kryetari i PD-së, Lulzim Basha, tha se kjo është dita ku ne nderojmë studentët e dhjetorit. Po ashtu ai u ka dhënë mbështetje studentëve protestues që të vazhdojnë betjen e tyre.