Operacion i Europol: Greqia zbulon qindra makina të vjedhura të lidhura edhe me Ballkanin e Zvicrën

© EU

Gjatë operacionit ndërkombëtar “Joint Action Day (JAD) Mobile 8”, i koordinuar nga Europol dhe ku morën pjesë 26 vende europiane, përfshirë Shqipërinë, Greqia ka zbuluar gjysmën e automjeteve të vjedhura të identifikuara në këtë aksion të gjerë policor. Në total, në të gjithë Europën u evidentuan 462 makina të vjedhura ose të falsifikuara, nga të cilat 231 u sekuestruan në territorin grek.

Sipas njoftimit zyrtar, ky numër është 232 më shumë se një vit më parë. Kontrolli i 6.548 automjeteve në Greqi rezultoi jo vetëm me sekuestrimin e 231 makinave, por edhe me arrestimin e 84 emigrantëve të paligjshëm dhe 21 trafikantëve. Gjithashtu, u konfiskuan 199.56 gramë substanca narkotike, përcjell albinfo.ch.

Policia greke ka bashkëpunuar në këtë operacion përmes strukturave të saj të specializuara kundër krimit të organizuar. Operacioni u zhvillua nga 20 deri më 31 tetor 2025, në kuadër të programit europian “Empact”, dhe u koordinua nga Frontex në bashkëpunim me autoritetet e Greqisë, Gjermanisë, Spanjës dhe Polonisë.

Përveç vendeve të Bashkimit Evropian si Austria, Bullgaria, Kroacia, Çekia, Franca, Gjermania, Holanda, Italia, Letonia, Lituania, Polonia, Portugalia, Rumania, Spanja dhe Suedia, u përfshinë edhe vende të treta si Shqipëria, Kosova, Moldavia, Mali i Zi, Maqedonia e Veriut, Serbia dhe Zvicra, si dhe agjencitë Europol dhe Interpol.

Nga ana greke, kontrollet intensive u kryen jo vetëm në kufijtë e jashtëm, por edhe brenda vendit, në qytete dhe rajone si Atika, Selaniku, Kilkís, Fthiotida, Thrakë dhe Sërres, si dhe në pikat kufitare Mertzani, Krystallopigi dhe Kakavia, me qëllim identifikimin dhe konfiskimin e automjeteve të vjedhura ose të modifikuara.