OKB: Iniciativat popullore të Zvicrës të respektojnë të drejtën ndërkombëtare

Nënkryetari i komitetit të përmendur, Yuval Shany, me këtë rast është shprehur veçanërisht i brengosur me iniciativën e marrë nga SVP-ja për vetëvendosje, me moton “E drejta zvicerane në vend të gjyqtarëve të huaj”

Keystone

Zvicra, para se t`i hedhë në votim iniciativat popullore, duhet të shqyrtojë më mirë shkallën e përputhjes së tyre me të Drejtën Ndërkombëtare. Kjo kërkesë del nga ekspertët, anëtarë të Komitetit për të Drejtat e Njeriut në kuadër të OKB-së, në Gjenevë.

Ky komitet është duke shqyrtuar mënyrën se si shtetet anëtare të OKB-së janë duke e respektuar paktin e OKB-së për të drejtat qytetare dhe politike.

Nënkryetari i komitetit të përmendur, Yuval Shany, me këtë rast është shprehur veçanërisht i brengosur me iniciativën e marrë nga SVP-ja për vetëvendosje, me moton “E drejta zvicerane në vend të gjyqtarëve të huaj”.

Zvicra po ashtu duhet të bëjë më tepër kundër racizmit, thuhet në raportin e publikuar.  Kështu ajo duhet, veç tjerash ta forcojë mandatin e Komisionit Federal kundër Racizmit.

Ndërkaq, komiteti është shprehur po ashtu i entuziazmuar edhe me zhvillimet pozitive që ka bërë Zvicra që nga testimi i fundit, në vitin 2009. Në to bën pjesë, veç tjerash, themelimi i Komisionit Nacional për Mbrojtje nga Tortura (NKVF).

Komiteti shprehet për një legjislacion më gjithëpërfshirës kundër diskriminimit dhe për barazi në mes të gruas dhe burrit në stafet  e ndërmarrjeve publike ose atyre të përfshira nga burra.

Po ashtu komiteti kërkon të rishqyrtohet legjislacioni sa i përket komunitetit të myslimanëve të Zvicrës. Nënkryetari i komitetit, Shany, ka thënë se e brengosin Iniciativat lidhur me mbulimin e fytyrës ose rastet e ndryshme në shkollat e Bazelit.