Numri i azilkërkuesve nga Ballkani, sa ai nga Iraku e Siria

Vetëm nga Kosova, Serbia e Mali i Zi kanë qenë 40.400 persona që kanë shfrytëzuar ndihmat për azilkërkues

Të dhënat më të reja të Entit Federal për Statistika, tregojnë se numri i shfrytëzuesve të ndihmave për refugjatë po shënon rritje për të katërtin vit me radhë. Në vitin 2013 veta kanë qenë 225 mijë që kanë shfrytëzuar ndihma të tilla, në para ose në triska, që është për një të tretën më shumë se një vit më parë.

Vetëm nga vendet e ish Jugosllavisë, gjegjësisht nga Kosova, Serbia e Mali i Zi kanë qenë 40.400 persona që kanë shfrytëzuar këto mjete. Ndërsa nga vatrat aktuale të krizës si Afganistani, Iraku dhe Siria, marrë së bashku kanë qenë 42.300 sish.

Kuota e njohjes së azilit në Gjermani gjatë vitit që shkoi ka qenë më e larta e shënuar gjatë disa viteve të fundit. Në tremujorin e dytë të këtij viti pothuajse çdo i treti azilkërkues (29.2 për qind) ka fituar azilin, shkruan gazeta “Frankfurter Rundschau”. Ndërsa në tremujorin e parë ky status u ishte njohur 23.9 për qind të personave që kishin kërkuar azil.