Nuk ndalen protestat në Serbi, Vuçiqit i kërkohet dorëheqje

Mijëra njerëz janë grumbulluar sërish të shtunën pasdite për të marrë pjesë në protestën e shtatë radhazi “Serbia kundër dhunës”.

Përveç kërkesave të tyre të mëparshme, pjesëmarrësit në këtë tubim të madh kërkuan dhe dorëheqjen e presidentit Aleksander Vuçiq dhe paralajmëruan një përshkallëzim të protestave.

Manifestime të mëdha u mbajtën gjithashtu edhe në Novi Sad, Nish dhe Kragujevc.

Protestat në Serbi nisën pas dy ngjarjeve makabre që tronditën Serbinë në fillim të majit. Protestuesit për shkak të gjuhës së dhunës së përdorur nga qeveria dhe promovimin e saj kërkojnë shkarkimin e ministrit të Punëve të Brendshme dhe të Agjencisë së Sigurisë dhe Informacionit, si dhe të anëtarëve të Rregullatorit të Mediave Elektronike dhe udhëheqjen e Shërbimit Publik të Serbisë.