Nuk kalon iniciativa për kontingjentet e të huajve

Deputetët që kanë votuar kundër iniciativës kanë theksuar se aplikimi i saj do t`i shkaktonte dëme të konsiderueshme ekonomisë zvicerane

Iniciativa e SVP/UDC-së për kufizimin e numrit të të huajve është hedhur poshtë në mënyrë të qartë nga deputetët e Dhomës së Kantoneve të Parlamentit të Zvicrës. Të vetmit që kanë votuar pro, kanë qenë deputetët e kësaj partie. Iniciativa kërkon që në tregun e punës në çdo rast të kenë përparësi zviceranët para të huajve.

Kërkesa tjetër është që të caktohen edhe kontingjentet vjetore me numrin maksimal të të huajve që mund të vijnë dhe të gjejnë punë në Zvicër. Deputetët që kanë votuar kundër iniciativës kanë theksuar se aplikimi eventual i saj do t`i shkaktonte dëme të konsiderueshme ekonomisë zvicerane. 

Ministrja e drejtësisë Simonetta Sommaruga ka thënë me këtë rast se është e vërtetë që në Zvicër ka probleme të ndryshme që lidhen me migracionin por iniciativa si e tillë nuk përbën zgjidhje për këto probleme.