Nuk ka “6 javë pushime për të gjithë”

28 përfaqësues të kantoneve kanë votuar kundër ndërsa vetëm 10 për iniciativën

Iniciativa e prezantuar nga sindikata Travaille Suisse për “pushimet vjetore gjashtëjavëshe për të gjithë” ka pësuar debakël në Dhomën e Kantoneve të Parlamentit Nacional. 28 përfaqësues të kantoneve kanë votuar kundër ndërsa vetëm 10 për iniciativën. Këtë iniciativë më parë e kishte hedhur poshtë edhe dhoma federale, me rezultatin 110 me 61.

Me gjithë faktin se askush nuk dyshon në ngarkesën e madhe që kanë të punësuarit, shumica në parlament ka vlerësuar se zgjatja e pushimeve nuk është mjeti i duhur për të zgjidhur problemin. Ndërsa rregullimi me kushtetutë i kësaj çështjeje është rruga e gabuar që kanë zgjedhur iniciatorët.

Ndërsa ata që votuan pro “Pushimeve gjashtëjavëshe për të gjithë”, qëndrimin e tyre e mbështetën në nevojën që kanë të punësuarit për tu çliruar nga stresi, në mënyrë që të jenë më efektivë në punë.

Sipas njërit nga përkrahësit “stresi në vendin e punës i kushton Zvicrës 10 miliardë franga, dhe 20% e meshkujve marrin pension invaliditeti me vite para moshës për pensionim”.