Nuk hiqet gjuha frënge nga shkollat e Kantonit Thurgau

Vetëm dy vota më shumë në parlament kanë mundur të grumbullojnë përkrahësit e frëngjishtes në shkolla, në krahasim me kundërshtarët

Në shkollat fillore të kantonit Thurgau, megjithatë do të vazhdojë të mësohet gjuha frënge si lëndë e rregullt mësimi. Në favor të kësaj ka vendosur sot,  momentin e fundit, Parlamenti i këtij kantoni. Vetëm dy vota më shumë kanë mundur të grumbullojnë përkrahësit e frëngjishtes në shkolla, në krahasim me kundërshtarët. Papritur është miratuar një kërkesë parlamentare e SP-së me 62 vota pro dhe 60 kundër, shkruan sda.ch.

Mësimi i frëngjishtes në ciklin e ulët të fillores (deri në klasën e gjashtë) ishte kundërshtuar me argumentin se nuk mësohej mirë dhe ishte ngarkesë për nxënësit, transmeton albinfo.ch. Për këtë arsye, kundërshtarët kishin kërkuar që gjuha frënge të mësohej në ciklin e dytë të shkollës fillore.

Sidoqoftë, me votimin e sotëm është hequr nga rendi i ditës kjo çështje, ndonëse në leximin e parë, në fillim të majit, ithtarët e heqjes së frëngjishtes nga programi i shkollave kishin epërsi në parlament. Kjo kishte ngritur një valë pakënaqësie në nivel vendi, pasi që kuptohej si një ikje nga politika konsensuale e mësimit të gjuhëve në nivel vendi.