Njoftime me SMS për përgatitjen e pasaportës

Qytetarët e Kosovës tash e tutje, do të njoftohen me sms apo e-mail për të marrë letërnjoftimin ose pasaportën. Kjo konsiderohet forma më e avancuar e MPB-së

Ministria e Punëve të Brendshme (MPB) së shpejti do të fillojë t’i njoftojë qytetarët e Republikës së Kosovës përmes sms-së apo email-adresave, për të tërhequr letërnjoftimin ose pasaportën e Republikës së Kosovës. Sapo të jenë gati dokumentet autoritetet i njoftojnë qytetarët që të shkojnë t’i marrin ato.

Kështu u tha të martën në një njoftim lëshuar nga Zyra për Informim e Ministrisë së Brendshme.

“Qytetarët me rastin e aplikimit për letërnjoftim ose pasaportë, duhet të japin te zyrtarët e MPB-së, numrin e telefonit apo emaill- adresën për ta pranuar këtë njoftim. Më pas ata do të njoftohen që dokument është gati dhe mund ta tërheqë në qendrën e aplikimit, po ashtu qytetarët do të njoftohen nëse ka ndonjë problem teknik me të dhëna dhe duhet të lajmërohen në qendrën e aplikimit për dokumente për t’i kompletuar të dhënat e kërkuara”, thuhet në njoftim.

Me këtë shërbim për qytetarët e Republikës së Kosovës, Ministria e Punëve të Brendshme, siç thuhet, është duke ngritë efikasitetin e punës në shërbim të qytetarëve.

Me këtë vendim të MPB-së, do të eliminohen pritjet e gjata të qytetarëve për t’i tërhequr dokumentet e udhëtimit. Deri më tani, për një pasaportë ose letërnjoftim qytetarët kanë pritur nga 10 ditë deri në një muaj. Ndërsa shpeshherë qytetarët kanë shkuar disa ditë rresht për ta tërheqë dokumentin, derisa e kanë marrë vesh se ai është gati.