Një shqiptar dhe një shtetas i Maqedonisë kapen me 9 kg. heroinë

Kapja ka ndodhur disa muaj më parë por autoritetet e kanë bërë të njohur rastin sot

Hetuesit policorë në regjionin Jura-Seeland të Kantonit të Bernës kanë zbuluar një rast të madh të tregtisë me heroinë. Janë kapur dhe po mbahen në burg për hetime një shtetas 51 vjeçar i Shqipërisë dhe një 57 vjeçar i Maqedonisë, shkruan 20minuten.ch. duke iu referuar komunikatës nga Prokuroria Publike Jura-Seeland.

Dy personat e përmendur pjesërisht kanë pranuar veprën. Ata duhet të përgjigjen për shkelje të kualifikuar të ligjit mbi narkotikët, transmeton albinfo.ch.

Policia ka zhvilluar përgjatë disa muajve hetime ndaj këtyre dy personave. Ndërsa në mesin e dhjetorit 2018 në komunën Ipsach policët kanë kapur në një vend plot 9 kilogramë heroinë, me vlerë tregu prej 1 milion frangash, përcjell albinfo.ch. Po ashtu në vendin e njëjtë janë gjetur edhe disa mijëra franga, para të gatshme.

Dy personat dyshohen se përgjatë disa muajve kanë blerë, përpunuar dhe magacinuar sasi të mëdha të heroinës. Sipas prokurorisë, ata drogën e kanë shitur kresisht në regjionin Seeland dhe atë Emmental.

---