Një mori aktorësh të jashtëzakonshëm në filmin e Tarantinos

Aktori Leonardo di Caprio do të jetë roli kryesor në filmin që flet për vrasjet e Charles Manson, ndonëse nuk do ta ketë rolin e liderit kult amerikan.

Di Caprio në fakt do të marrë pjesë në pjesën e mëvonshme të filmit emri i të cilit ende nuk dihet, ndonëse është e qartë se produksionin dhe regjinë do ta bëjë i shpërblyeri me Oscar, Quentin Tarantino, përcjell albinfo.ch.

Ende nuk dihen as të tjera detaje rreth këtij filmi, por vetë regjisori kishte deklaruar qysh në nëntor që nuk do të jetë film i madh biografik, por një tregim që do të zhvillohej në verën e 1969 kur një seri vrasjesh mizore kishin ndodhur në Kalifornia të kryera nga ithtarët e Mansonit.

Manson, njëri prej kriminelëve më famëkeq të shekullit 20, vdiq në nëntor në moshën 83-vjeçare. Ai vuante dënimin me burgim të përjetshëm për urdhrin në vrasjen e 9 personave, përfshirë aktoren Sharon Tate.

Filmi do të duhej të publikohej më 9 gusht 2019, saktësisht 50 vjet që nga kryerja e vrasjeve.

Raportohet se rolin e Tate do të duhej ta aktronte australiania, Margot Robbie. Tom Cruise dhe Brad Pitt dhe Al Pacino po ashtu thuhet se do të jenë pjesë e filmit.