Një kartëpostale misterioze thërret zviceranët “t`i mbulojnë gratë”

"Ne duam të ju lusim që gratë, nëse është e mundur, t`i mbuloni, jo vetëm për hir të vullnetit të Allahut por edhe për të mundësuar një bashkëjetesë paqësore!”

Një kartolinë misterioze në të cilën shihet një minare xhamie e ngulitur përmes fotomontazhit në panoramën e fshatit, ka befasuar qytetarët e disa vendbanimeve zvicerane.

“Me nderime ju përkujtojmë se ne së shpejti do të jemi shumica”. Kështu fillon teksti në anën e prapme të

kartëpostales që në mëngjesin e të martës ka “aterruar” në kutitë postare të qytetarëve të disa komunave në regjionin rreth Liqenit të Cyrihut. Për këtë ka shkruar fillimisht gazeta lokale Züriseezeitung dhe pastaj lajmi është publikuar edhe në shumicën e mediave online dhe elektronike të Zvicrës.

Shkruesi i tekstit, i cili identifikohet si “Këshilli Qendror Islamik” i qytetit ose fshatit përkatës (Lachen, Herrliberg, Eschenbach etj.) në vazhdim thotë se “gëzohet se më në fund nën islamin do të vijë edhe paqja në fshatin tuaj, transmeton albinfo.ch. “Ne duam të ju lusim që gratë, nëse është e mundur, t`i mbuloni, jo vetëm për hir të vullnetit të Allahut por edhe për të mundësuar një bashkëjetesë paqësore!”.

Emërtimi i adresuesit (Këshilli Qendror Islamik) tingëllon shumë ngjashëm me Këshillin Qendror Islamik të Zvicrës (IZSR), të njohur për qëndrimet e veta ekstreme fetare. Por, nga IZSR deklarojnë se nuk kanë të bëjnë  me këtë aksion të cilin edhe e dënojnë ashpër, përcjell albinfo.ch. “Mbrapa kësaj mbase qëndron ndonjë patriot tepër i zellshëm i cili dëshiron t`i alarmojë bashkatdhetarët e tij nga një rrezik inekzistent”, thotë sekretarja e IZSR, Ferah Ulucay.

Edhe kryetari i Komunës Eschenbach, njërës nga komunat ku është shpërndarë kartolina misterioze, e ka dënuar ashpër këtë aksion. “Me popullatën myslimane në Eschenbach nuk kemi fare probleme”, ka thënë ai, duke e cilësuar shpërndarjen e kësaj kartoline si një provokim.