Nisin hetimet për trazirat në Bernë

Rrjeti social facebook, përmes të cilit njerëzit janë thirrur në mënyrë anonime për të marrë pjesë në manifestim përbën njërën ndër pistat e hetimeve

Trazirat me të cilat kulmoi manifestimi “Tanz dich Frei” i mbajtur natën e të shtunës në Bernë do të kenë pasojat e tyre juridike për shkaktarët. Prokuroria regjionale Bern-Mittelland ka iniciuar tashmë hetimet. Ato fillimisht drejtohen kundër personave të panjohur, pasi që thirrjet për pjesëmarrje në atë manifestim kanë qenë anonime, të bëra përmes rrjetit social facebook.

Në fokus të hetimeve ndodhen katër vepra penale: Shkaktim dëmesh materiale, lëndim trupor, dhunë dhe kërcënim kundër zyrtarëve si dhe prishje të qetësisë, shkruan nzz.ch. Te pjesa për dëme materiale, nga shkaku se dëmtimet janë të shumta, bëhet fjalë për dëm të kualifikuar material që është delikt zyrtar, thotë një zëdhënës i prokurorisë së përmendur.

Rrjeti social facebook, përmes të cilit njerëzit janë thirrur në mënyrë anonime për të marrë pjesë në manifestim përbën njërën ndër pistat e hetimeve të prokurorisë. Por, ajo nuk përbën prioritet, thonë në prokurorinë Bern-Mittelland.

Përveç masave hetimore të paralajmeëruara nga organet përkatëse, edhe pjesa më e madhe e spektrit politik zviceran e ka dënuar dhunën e ushtruar në manifestimin “Tanz dich Frei”, ku janë lënduar rreth 50 persona.