Nga Kosova ikën 5130 nxënës

Ministri i Arsimit, Shkencës dhe Teknologjisë, Arsim Bajram tha se nga shkollat fillore dhe ato të mesme janë larguar 5130 nxënës, të cilët kanë ikur me prindër në BE

Vetëm gjatë muajve të fundit, mësimin e kanë ndërprerë mbi 5100 nxënës të shkollave fillore dhe të mesme në Republikën e Kosovës. Të gjithë këta nxënës, kanë ikur bashkë me familjarët e tyre, ilegalisht në shtetet e Bashkimit Evropian, në kërkim të një jete më të mirë.

Këto shifra i publikoi ministri i Arsimit, Shkencës dhe Teknologjisë, Arsim Bajrami gjatë mbledhjes së rregullt të Kuvendit të Kosovës, duke e konsideruar migrimin ilegal si shqetësimin më të madh për shoqërinë kosovare.

“Procesi i largimit ka përfshirë edhe sektorin e edukimit dhe ne kemi shifra ekzakte të cilat janë të proceduara para një jave, përkatësisht rreth 5130 nxënës të cikleve parauniversitare. Jemi duke tentuar që të flasim me prindër që këta nxënës të kursehen”, ka theksuar ministri Bajrami.

Ai i është përgjigjur pyetjes së deputetit të Lëvizjes Vetëvendosje, Faton Topalli, i cili u interesua edhe për numrin e studentëve që kanë braktisur universitetin. Për studentët, ministri Bajrami tha se nuk ka informacione të sakta, por premtoi se në seancën e radhës do të dihet edhe ky numër.

Ndryshe, numri i kosovarëve që kanë migruan jashtë vendit, ka shqetësuar edhe shtetet fqinje.

Kryeministri i Serbisë, Aleksandar Vuçiq ka paralajmëruar se lidhur me emigrantpt kosovarë, Serbia po ndërmerr të gjitha masat në marrëveshje me Hungarinë, Austrinë dhe Gjermaninë, për parandalimin e tyre. Megjithatë ai ka thënë se Serbia nuk mundet dhe nuk do të shkelë lirinë e lëvizjes.