“New York Times” shkruan për miratimin e projektit të Kushner për Sazanin 

Qeveria e Shqipërisë i ka dhënë miratimin paraprak një plani të propozuar nga Jared Kushner, dhëndri i Donald J. Trump, për të ndërtuar një kompleks hoteli luksoz me vlerë 1,4 miliardë dollarësh në një bazë të vogël ushtarake të braktisur në brigjet e Shqipërisë, sipas “New York Times”.

Ky është një nga disa prej projekteve që përfshin Trump dhe familjen e tij me vendet e huaja – që kanë çështje politike në pritje me Shtetet e Bashkuara të Amerikës.

Miratimi i Komitetit të Investimeve Strategjike të Shqipërisë, i cili drejtohet nga kryeministri Edi Rama, i jep Kushner dhe partnerëve të tij të biznesit të drejtën për të vazhduar me negociatat e përshpejtuara për ndërtimin e resortit luksoz në një seksion prej 111 hektarësh të ishullit të Sazanit prej 2,2 milje katrorë që do të lidhet me traget me kontinentin.

Kushner dhe qeveria shqiptare – të pyetur më parë për këtë projekt – thanë se vlerësimi nuk po ndikohet nga lidhjet e Kushner me Trump apo nga ndonjë përpjekje tjetër për të kërkuar favore nga qeveria e SHBA-se.

“Fakti që një sipërmarrës kaq i njohur amerikan tregon interesin e tij për të investuar në Shqipëri, na bën shumë krenarë dhe të lumtur”, tha një zëdhënës i Ramës, vitin e kaluar në një deklaratë për “New York Times”, kur u pyet për projektin.

“Kushner’s Affinity Partners”, një kompani private me një kapital prej rreth 4,6 miliardë dollarë – kryesisht nga Arabia Saudite dhe fonde të tjera të pasurisë sovrane të Lindjes së Mesme – po ndjek projektin e Shqipërisë së bashku me Asher Abehsera – një ekzekutiv i pasurive të paluajtshme me të cilin Kushner është bashkuar edhe më herët për të realizuar projekte në Bruklin, Nju Jork.

Qeveria shqiptare – sipas një dokumenti zyrtar të publikuar së fundmi në internet, tani do të punojë me partnerët e saj amerikanë – për të pastruar vendndodhjen – ku do të ngrihet hoteli – nga çdo municion potencial – dhe për të shqyrtuar çdo shqetësim tjetër mjedisor ose ligjor që duhet të zgjidhet përpara se të vazhdohet më tej me projektin.

Dokumenti, i datës 30 dhjetor, vë në dukje se qeveria ka të drejtë të revokojë vendimin, në varësi të negociatave përfundimtare të projektit.

Kompania e Kushner tha se plani është të ndërtohet një “komunitet eko-resort” me pesë yje në ishull – duke e kthyer ish-bazën ushtarake në një destinacion të gjallë ndërkombëtar për mikpritjen dhe mirëqenien.

Ivanka Trump, vajza e Trump, tha se do të japë ndihmën e saj në këtë projekt.

“Ne do ta zbatojmë atë”, tha ajo për projektin, gjatë një podcast-i vitin e kaluar.

Ky projekt është vetëm një nga dy marrëveshjet e mëdha të pasurive të paluajtshme që Kushner po ndjek së bashku me Abehsera – që përfshijnë qeveri të huaja.

Më vete, partneriteti mori miratimin paraprak vitin e kaluar për të ndërtuar një kompleks hoteli luksoz në Beograd, Serbi, në ndërtesën e ish-Ministrisë së Mbrojtjes, e cila ka mbetur bosh për dekada – pasi u bombardua nga NATO në 1999 gjatë një lufte atje.

Serbia dhe Shqipëria kanë çështje të politikës së jashtme në pritje me Shtetet e Bashkuara të Amerikës – pasi të dyja vendet kërkojnë mbështetjen e vazhdueshme të SHBA-së për përpjekjet e tyre të bllokuara prej kohësh – për t’u bashkuar me Bashkimin Evropian – ndërsa zyrtarët në Uashington po përpiqen të bindin Serbinë që të forcojë lidhjet me Shtetet e Bashkuara të Amerikës, në vend të Rusisë.

---