Nesër festa e Bajramit të Madh

Përfaqësuesit e institucioneve kosovare kanë marrë urime për këtë festë nga liderët e ndryshëm botëror, përfshirë këtu mesazhe urimi nga presidenti i SHBA-ve, Barak Obama

Kryesia e Bashkësisë Islame të Kosovës njofton opinionin e gjerë se muaji i madhëruar i Ramazanit përfundon sot e mërkurë, ndërsa dita e parë e Fitër Bajramit, e njohur tradicionalisht ndër shqiptarë si Bajrami i Madh, është nesër me 8 gusht (e enjte).

Manifestimi qendror i festës së Fitër Bajramit për Kosovë mbahet në Xhaminë e Madhe, në Prishtinë. Namazi i Fitër Bajramit falet në orën 6:12 minuta, nën udhëheqjen e dr. Hajredin Hoxhës, ndërsa hytben do ta mbajë myftiu i Kosovës, Naim Tërnava.

Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’ua ketë pranuar agjërimin, lutjet dhe ibadetet.

Për festën Bajramit, që vjen pas një muaj agjërim të Ramazanit, kanë uruar edhe përfaqësuesit e institucioneve kosovare, presidentja Atifete Jahjaga, kryeministri Hashim Thaçi, kryeparlamentari Jakup Krasniqi, ministri i Punëve të Jashtme, Enver Hoxhaj e shumë përfaqësues institucionesh.

Gjithashtu përfaqësuesit e institucioneve kosovare kanë marrë urime për këtë festë nga liderët e ndryshëm botëror, përfshirë këtu edhe mesazhe urimi nga presidenti i SHBA-ve, Barak Obama.

“Në emër të popullit Amerikan, po ju përcjell ju dhe popullit të vendit tuaj dëshirat më të mira me rastin e festës së madhërishme të Fitër Bajramit”, thuhet në fillim të urimit të presidenti Obama derguar presidentes Atifete Jahjaga.