Në Zvicër jetojnë 1 milion e 886 mijë të huaj

Bilanci në mes të të ardhurve dhe të ikurve gjatë tetorit ka qenë për 11791 plus ndërsa gjatë nëntorit 7053 minus

Trendi që shënon më shumë të huaj që vijnë në Zvicër se sa që e braktisin atë, ka vazhduar edhe gjatë tetorit dhe nëntorit të vitit që po e lëmë pas. Kështu bilanci në mes të të ardhurve dhe të ikurve gjatë muajit tetor ka qenë për 11791 plus, gjegjësisht në favor të të ardhurve, që, në krahasim me muajin e njëjtë të një viti më parë është për 27 për qind më i madh.

Ndërsa gjatë muajit nëntor janë shënuar 7053 ardhje më pak në krahasim me ata që kanë braktisur Zvicrën ose për 26.2 për qind më pak të ardhur se në muajin nëntor 2012, njofton Zyra Federale për Migracion (BFM).

Numri i përgjithshëm i të huajve që jetojnë në Zvicër rezulton 1 milion e 886 mijë veta.

Gjatë këtyre dy muajve janë dhënë 9500 leje qëndrimi të përkohshëm (Viza B) për të punësuar nga vendet e 17-shit të BE-së, shkruan news.ch. Për arsye se Qeveria Federale në muajin prill pati aktivizuar të ashtuquajturën “klauzolë ventil” për vendet e përmendura, për çdo tremujor numri i vizave të përmendura që lëshon Zvicra nuk mund të kalojë mbi 13428 sish.

Marrë në tërësi, gjatë vitit 2012 numri i popullatës së huaj në Zvicër është rritur për 53 mijë.