Tiranë: Edicioni i tretë i spektaklit “Shën Tereza, shqiptarja e gjithë botës”

Ky edicion mbahet më 5 shtator

Më 5 shtator do të mbahet edicioni i 3-të të spektaklit “Shën Tereza, shqiptarja e gjithë botës”, spektakël që mbledh 12 personalitete të suksesshëm në biznes në botë, të cilët kanë ndihmuar shqiptarët, por edhe kanë kontribuar në kauzat kombëtare.

Edicioni i parë është realizuar në Prishtinë, i dyti në Shkup, e tashmë i takon Tiranës, si kryeqyteti shqipfolës, që të mirëpresë “ambasadorët” e vërtetë shqiptarë, të cilët na bëjnë krenarë nëpër botë e që janë motori i rëndësishëm i ekonomisë.

Spektakli është konceptuar artistik, ku nuk do të mungojë orkestra Filarmonike e Teatrit Kombëtar të Operës dhe Baletit me të ftuar speciale disa artistë lirikë dhe me pjesëmarrjen e një aktori brilant të teatrit dhe kinemasë shqiptare.

Për rreth 2 orë transmetim publiku do të njihet me shqiptarë të suksesshëm nga Shqipëria, Kosova, Maqedonia e Veriut, Amerika, Italia, Greqia, Austria, Anglia, Franca etj., të cilët do të nderohen në këtë skenë me çmimin “Nënë Tereza”.

Skenografinë e këtij projekti producenti Guga ia ka besuar mjeshtrit Bledar Gërcaliu, i cili do të vijë me një koncept të ri duke luajtur me simbolikën, duart e saj dhe mantel bardh e blu, simbolet e Nënë Terezës.

Spektakli i madh do të realizohet në sallën e madhe të Teatrit Kombëtar të Operës e Baletit me 800 spektatorë në sallë. Duket se Guga e ka të garantuar suksesin me emrat që punon si drejtori fotografisë Olsi Tufa, mjeshtri i grafikës Taulant Hyso, mjeshtër audio Andri Gjini e Argest Rushiti, producenti muzikor Jusiald Xhani, kompozitori Gent Myftaraj dhe stilist Joni Peci, i cili do të kujdeset për veshjet e producentit e prezantuesit Sokol Guga dhe Matilda Mcini.

Shqiptarët do të kenë mundësinë të ndjekin me datë 5 shtator spektaklin “Shën Tereza, shqiptarja e gjithë botës”, në televizionin kombëtar Klan Plus.

---