Në Spitalin Universitar të Gjenevës, vetëm me maska

Kjo masë parandaluese vlen jo vetëm për gjithë personelin, por edhe për vizitorët

Bartja e maskës mbrojtëse të gojës do të bëhet e detyrueshme për personelin e Spitalit Universitar të Gjenevës. Një vendim i tillë që, sipas autoriteteve spitalore hyn në fuqi menjëherë, përbën një masë të përkohshme  dhe ka për synim përballjen me epideminë e gripit.

Spitali i Gjenevës ka marrë këtë vendim pasi që epidemia e sivjetme e gripit ka qenë shumë e rëndë në krahasim me vitet tjera.

Kjo masë parandaluese vlen për të gjithë personelin, pa përjashtim: madje, përveç personelit mjekësor e kujdestar, ajo është e detyrueshme edhe për vizitorët. Për më tepër, edhe pacientët duhet të vejnë maska kur dalin nga dhoma e tyre e spitalit.