Në Gjermani përshpejtohet njohja e diplomave të huaja

Me ligjin e ri vlerësimi i diplomave nga jashtë do të bëhet brenda tre muajsh, pavarësisht në cilin vend të botës janë lëshuar ato

Diskutimi ka zgjatur me vite. Më në fund më 29. Shtator 2011, Bundestagu gjerman ka vendosur për ligjin e njohjes së diplomave të huaja. Tashmë pritet vetëm fjala e fundit e Këshillit Federal që ligji të hyjë në fuqi, njofton DW.

Me ligjin e ri vlerësimi i diplomave nga jashtë do të bëhet brenda tre muajsh, pavarësisht në cilin vend të botës janë lëshuar ato. Për vlerësimin e diplomave do të ketë një qendër për të gjithë Gjermaninë, dhe jo më dikastere të ndryshme nëpër ministri të ndryshme.

Sipas Ilona Riesen, referente për politikën e punës dhe arsimit në Institutin Gjerman të Ekonomisë,  tashmë me ligjin e ri shfaqen shpresat që kjo urë e re të ngrihet për emigrantët e rinj që nuk kanë shumë kohë në Gjermani.

Ligji i ri është një jo vetëm një trajtim i drejtë i të huajve, por edhe një nevojë urgjente e kohës në Gjermani. “Ky ligj ka një rëndësi të veçantë si nga pikëpamje ekonomike ashtu edhe ajo shoqërore. Ata që preken drejpërdrejt nga ky rregull i ri janë rreth 300.000 vetë“, mendon Ilona Riesen. Do të ishte e padrejtë të injoroje diplomat e kësaj pjese të popullsisë, thotë ajo.