Në Cyrih, 4 autobusë “dalin në terren” për të vaksinuar popullatën

95 për qind e pacientëve me koronavirus të rëndë që trajtohen në njësitë e kujdesit intensiv të Kantonit të Cyrihut janë të pavaksinuar

Për të rritur normat e vaksinimit, në kantonin e Cyrihut së shpejti do të përdoren autobusët e vaksinimit. Kjo bëhet për të parandaluar mbingarkesën e sistemit shëndetësor.

95 për qind e pacientëve me koronavirus të rëndë që trajtohen në njësitë e kujdesit intensiv të Cyrihut janë të pavaksinuar.

“Këto shifra demonstrojnë qartë efektivitetin e lartë të vaksinimit dhe rrezikun e virusit për njerëzit që nuk janë tëvaksinuar,” thotë drejtoresha e Shëndetit për Kantonin e Cyrihut, Natalie Rickli, shkruan sda.ch.

Katër autobusë vaksinimi nga mesi i gushtit

Nga mesi i gushtit, katër autobusë vaksinimi do të qarkullojnë nëpër kanton, të cilët do t`ia afrojnë vaksinim më pranë popullatës, transmeton albinfo.ch. Komunat, si dhe universitetet, shkollat ​​e mesme dhe ato profesionale mund të porosisin automjete vaksinimi për ngjarje të veçanta.

Kantoni , nga ana e tij ofron staf, materiale dhe vaksina falas. Nëse ka kërkesë të mjaftueshme, oferta do të shtrihet edhe në klube dhe kompani.

Automjetet do të jenë në përdorim për herë të parë të shtunën, më 21 gusht në komunën Gossau.

Personat e pavaksinuar që kthehen nga pushimet, duhet të testohen

Sipas njoftimit, interesi i institucioneve arsimore për vaksinim në vend është i madh, përcjell albinfo.ch. Universiteti i Cyrihut, Universiteti i Edukimit dhe ai i Arteve, po në Cyrih, si dhe katër shkolla profesionale dhe gjashtë shkolla të mesme do t’u ofrojnë punonjësve të tyre dhe studentëve ose nxënësve mundësi vaksinimi.

Për më tepër, të kthyerve nga pushimet të cilët as nuk janë shëruar dhe as vaksinuar, u kërkohet të testohen menjëherë pasi të kthehen në shtëpi. Rreth gjysma e njerëzve që aktualisht kanë rezultuar pozitiv supozohet të jenë infektuar jashtë vendit.

Në Cyrih janë vaksinuar së paku njëherë 70 % e të rriturve ndërsa në Bernë, 60%

Deri më tani, rreth 70 për qind e popullsisë së rritur në Cyrih është vaksinuar të paktën një herë, kanë thënë autoritetet e kantonit të enjten.

Kantoni i Bernës gjithashtu të enjten ka bërë një azhurnim të vaksinimit. Sipas kësaj, 62 për qind e popullsisë të moshës dymbëdhjetë vjeç e lart janë vaksinuar të paktën një herë

Qendra e parë e vaksinimit në kanton do të pushojë funksionimin këtë javë, përcjell albinfo.ch. Për këtë qëllim, po krijohen kapacitete të reja dhe një “rrjet i dendur vaksinimi” në spitalet rajonale.

Më tutje, kamioni i vaksinimit do të niset përsëri në turne, duke filluar nga e premtja.

Vaksinimet janë gjithashtu të mundshme në barnatore dhe tek mjekët e familjes. Të gjithë personat e moshës mbi dymbëdhjetë vjeçare në kantonin e Bernës pranohen të vaksinohen.

---