Në Bernë promovohet libri “Klithma” i autores Alketa Gashi-Fazliu

Libri sjell rrëfime të fuqishme dhe tronditëse të fëmijëve të gjymtuar gjatë luftës në Kosovë

Të shtunën, më 28 mars 2026, në orën 18:00, në Kongresszentrum Allresto në Bernë (Effingerstrasse 20, 3008 Bern – Parking City West), me organizimnga Lidhja Shqiptare në Botë do të mbahet promovimi i librit “Klithma” të autores Alketa Gashi-Fazliu.

Libri sjell rrëfime të fuqishme dhe tronditëse të fëmijëve të gjymtuar gjatë luftës në Kosovë. Përmes dëshmive të tyre, autorja ndriçon pasojat më të dhimbshme të luftës – plagët që mbeten jo vetëm në trup, por edhe në shpirt.

“Klithma” vjen si një thirrje për kujtesë dhe ndërgjegjësim, duke rikujtuar se pas çdo statistike të luftës fshihen histori njerëzore të dhimbjes, por edhe të forcës, guximit dhe shpresës për të vazhduar përpara.

Promovimi në Bernë pritet të mbledhë dashamirës të librit, përfaqësues të komunitetit dhe publikun e interesuar për të reflektuar mbi një kapitull të rëndësishëm të kujtesës kolektive.

---